PIC DE LA SERRERA 2913 mt Sorteny-tik

2017-07-17 Bezperako aparkaleku berdinean gaude, baina gaur informazio gunearen ondotik ateratzen den bidetik joango gara, Sorteny haranera. Helburua, Pic de la Serrera da.

Ibilbideak ez dauka sekreturik. Sorteny aterpetik igaro, Pleta de la Serrera-ra igo eta handik Collada dels Meners-era, ondoren ertza jarraitzeko tontorreraino. Bide guztia oso ondo markatuta dago eta gainera Pirinioko Alta Ruta jarraitzen du Meners leporaino.

Sorteny aterperaino pistatik joan daiteke, baina hasieran nahiago dugu erreka ondotik doan bide egokitutik igotzea. Politagoa da.

Lorategi botanikoa. Hemendik aurrera pistatik joan beharra dago.

Aterpera heldu baino lehen, Estanyó-ra doan bidea ateratzen da eskuinera. Hau ezagutzen dugu. Oso interesgarria baita ere.

Aterpea igaro eta benetako lorategian barneratzen da bidea.

Lirioak eta Geum montanum izena duten beste landare kuriosoak.

Asko ari zaigu gustatzen haran hau. Pasada bat da zenbat lora eta landare desberdin dauden.

Atzera begira, Sorteny harana eta aterpea gezi gorria dagoen puntuan.

Bide oso polita eta erosoa Pleta de la Serrera-ra igotzeko.

Hezeguneak Pleta de la Serreran.

Orain haran honetatik gora egin behar dugu. Eskuinean Estanyó daukagu eta Serrera ezkerrean, baina oraindik ez dugu ikusten.

Siempreviva.

Gentziana horia.

Pleta de la Serrera. Txabola bat erreka ondoan.

Goruntz, Geum Montanum artean.

Eta halako batean, sorpresa!. Emakume bat (gida dirudi) bost neska-mutil gazterekin. Martxa azkarrean gainera.

Pasatzen utzi eta gu geurera,

Aurrean daukagu Meners (edo La Mina) lepoa. Horra igo eta gero ezkerreko ertza jarraituko dugu.

Eguraldi arraroa dago gaur, eta arratsalderako ekaitzak daude iragarrita. Estanyó mendia orain hasi da agertzen.

Meners lepora igotzen.

Gure Serrera ere agertu da. Badirudi zortea izango dugula... Ertzean, beste aldetik (Ramsol-etik) igo duten bi mendizale.

Collada dels Meners (2653m). Igoera oso erosoa honeraino.

Leporako azken metroetan.

Lepoaren beste aldean Ramsol harana. Horra jarraitzen du HRPak, eta hortik ere bide oso nabarmena dator hona.

Garbitu eginda gure tontorra. Hau da geratzen zaigun aldapa (260 bat metroko garaiera-aldea).

Estany dels Meners de la Coma, lepoaren azpian.

Lakua eta Pic de la Coma de Seignac (2863m).

Igo dugun haranaren beste aldean, Pic del Estanyó.

Estany dels Meners de la Coma, ertzetik.

Aldapa gogorra hemen, baina bidezidor egokiarekin.

Eta tontorrera heltzen. Seikotea apur bat lehenago heldu da. Badute meritoa ume hauek!

PIC DE LA SERRERA (2913m). Tontorreko tramankuluarekin.

Zortea izaten ari gara eguraldiarekin eta gustora gaude tontorrean.

Abere ugari ikusten da tontorraren azpian dagoen Coma de Seignac haranean. Frantzia aldea.

Bezperako Font Blanca mendia.

Solanet lakua dela uste dugu.

Font Blanca aurrean eta Besiberri mendilerroa atzean.

Estanyó.

Pic de Escobes-Pic de Ruf eta Juclar ingurua. 2012an ibili ginen alde horretan.

Beheruntz, Meners lepora jetsi eta gero eskuinera, igoerako bidetik.

Ertzean, Estany dels Meners de la Coma-rekin.

Muino hau zeharkatu behar dugu lepora iristeko. Aurrean, Pic de la Cabaneta.

Hodeiak sartzen ari dira, baina gozatzeko jetsiera da hau.

Siempreviva erraldoia.

Pleta de la Serrera eta Ordino-Arcalís ingurua.

Pic de la Font Blanca.

Zoragarria dagoen koloretasuna. LORATEGIA!!!

Zabalik daukagu basotik irteteko atea...

Sorteny-ko aterpea. Zainduta dago eta erosotasun guztiak ditu. Menua ere ematen dute, eta kotxetik orduerdi exkasera dagoenez, jende asko aurkitu dugu bertan.

Hau da irteeran dagoen errotulua. Guk gutxiago behar izan dugu lepora heltzeko. Ibilbide erosoa baina ederra iruditu zaigu. Kotxera itzuli garenean, aldatzen gaudela, lehen euri tantak hasi dira, eta ondoren, ekaitz bortitza jaurti du, tximista, trumoi eta txingor bola lodiekin... Arcalís-etik jeisten ari ziren txirrindulariak, tuneletan babestu behar izan dira eta errepidea erabat zuritu da. Guk zortea izan dugu...

Hauek dira Andorrako 2900 metro baino gehiago duten mendiak. Ezagutu ditugu seirak, baina honekin ez dugu ezer bukatzen... Mendi eta inguru ugari daude oraindik ezagutzeko Andorran.

FONT BLANCA 2903mt Rialb Arana-tik

2017-07-16 El Serrat-etik gora dagoen Sorteny-ko aparkalekuan gaude. Baina gaur ez gara Sorteny haranera, Rialb-ekora baizik. Rialb-eko harana ezagutu eta Font Blanca mendira igotzea da plana. Eguraldi ederra gaur ere.

Irteeran dagoen informazioa. Gu Rialb aterpearen ondotik joango gara, baina ondoren Port de Siguer-eko bidea utzi eta ezkerrera hartuko dugu, Rialb harana jarraituz.

Hasiera basotik da, errekaren ondotik eta dena loraz beteta. Dotorea!

Basotik atera ondoren, harana zabaldu egiten da. Bidea oso erosoa beti.

 Font Freda bide ertzean aurkituko dugu. Izena ondo ipinita dauka.

Rialb-eko aterpe irekia Pic del Port de Siguer-en azpian. Orain ez gara hurbilduko bertara. Jeisterakoan joango gara.

Errekaren beste aldera pasako gara.

Bidea oso ondo markatuta, beti bezala. Oraindik bide berdina da bai Rialb-era eta bai Siguer-era joateko.

Lirioak.

Errekaren ezkerretik (igoerako norabidean). Hor aurrean aurkituko dugu bidegurutzea.

   

Gu ezkerrera, Portella de Rialb-era. Egun guztian, gu bakarrik joango gara horruntz. Gainontzeko jende guztia, Siguer mendatera eta Bleu lakura joango da.

Gaur ere ilargia daukagu lagun.

Rialb haranaren gainean daukagu Font Blanca mendia, gure helburua. Ezkerrean antzematen den lepora heldu behar gara lehenbizi.

Erdian dago Portella de Rialb. Bere ezkerrean Besalí mendia, eta eskuinean Font Blanca-ren ertza.

Nahiz eta aldapa tentea egon toki batzutan, gozamena da haran honetatik igotzea, lora ugari baitaude eta ura beheko partean.

Rododendro batzuk ere loratan irauntzen dute oraindik. Marka horiak izango ditugu lagun tontorreraino.

Ilargia Rialb lepoaren gainean.

Lepotik atzera begira, igo dugun Rialb harana, eta Port de Siguer mendatea eta Thoumasset mendia.

Lepoaren beste aldean Ordino Arcalís eski-estazioa eta Pic de Cataperdís, Medacorba aldea, Pic de Lavans (erdiko piramidea), e.a.

Lepoko harkaitz batean dago margotuta (2509m). Ordino-ko errepidetik igoera zuzena dago hona.

Rialb lepoa eta Besalí mendia atzean utzi, eta ertzaren azpitik zeharkaldia egiten, marka horiak jarraitzen beti.

Zeharkaldiaren ondoren, lepo horretara igo behar dugu. Hor malda handiagoa da.

Baina bidezidorra dago eta ondo igotzen da.

Eta aurrean daukagu Font Blanca-ren azkenengo zatia. Ea 200 metroko aldapa tentea, baina oso ondo marratutako bidezidorrarekin.

Eskuinean, Port de Siguer, Bleu laku ederra eta Thoumasset mendia.

Eta FONT BLANCA tontorrean dagoen tramankulua (2905m). Ez da izango aurkituko dugun azkena. Bertan zeuden katalan batzuk esan zigutenez, Ordino-ko kirol dendak edo bultzatuz, 5 edo 6 tontorretan jarri dituzte horrelakoak, eta ez dakit 4 argazkirekin edo (noski, in situ egindakoak), opariren bat ematen omen dute... Beste promozio bat!

Ezkerrean, nahiko gertu daukagu Tristaína mendia, Ordino-Arcalís gainean. Atzean, Pica d'Estats.

Semearekin Tristainan 1999an. Oroitzapenak!

1999an Tristainan.

Frantzia alderuntz, Estany del Roig eta Gnioura urtegia.

Estanys dels Llaciers.

Pic  Estanyó eta bere lakua. 2012an, lakua inguratzen duen zirko guztia egin genuen. Beste ibilbide eder bat.

Eta aurrekoaren ondoan, Pic de la Serrera, 2900 metro baino gehiago dituzten seietatik orain falta zaiguna. Beraz, biharko plana eginda dago!

Eta bagoaz beheruntz. Goiko aldapa latza jetsi dugu.

Jetsiera igoerako toki beretik egingo dugu. Rialb haranean.

Lehen esan dugun bezala, bakar bakarrik ibili gara haran honetan.

Rialb aterpera etorri gara, ur freskoa hartu eta kerizpe apur baten bila.

Aterpea, atzoko Pla de l'Estany-koaren berdina. Bi alde ditu, bata itxia eta bestea irekia, txukuna eta garbia.

Haranaren beheko aldea.

Gaurko ibilbidea. Guztira 7bat ordu ibili gara, atsedenak ere kontutan hartuta. Ordino-Arcalísetik dauden ibilbideak laburragoak dira, baina guk Rialb harana ezagutzea nahi genuen, eta benetan merezi duela uste dugu. Bihar arte!