2019/01/31

IZASPI 973 mt, SAMIÑO 933 mt, BELOKI 659 mt, Antikoko Ermitatik

2019-01-19 Zumarragako Antigua ermitan gaude. Aspaldian ez gara ibili Izazpi eta Samiño aldean, eta Antiguatik inoiz ez dugu igo paraje hauetara. Hurrengo egunetarako eguraldi petrala omen dator ...

Zumarragako beste mendi ezaguna, Irimo. Hortik gure herriraino zeharkaldi dotorea egin daiteke, Gorla, Elosu eta Karakatetik.
Hau da gaurko ibilaldia. Lehenbizi Izazpira, Samiñora ondoren, eta Antiguara itzultzerakoan Belokitik pasa.
wikiloc/antioko-ermita-izaspi-samino-beloki-
Ermita.

Ezkio eta Ormaiztegi aldeak behelainoekin. Gu pistatik goaz Osinalde aldera.

Aizkorri "bolloarekin".

Antigua, Elorriaga lepora doan pistatik.

Baserrien izenak Elorriaga lepoan.

Eta galtzen ari diren lanak.

Elorriagatik Arantzetakogainera igo dugu, diagonal luzea eginez Izazpiren magaletan. Orain eskuinera.

Baso honen ertzetik goaz goruntz. Eguzki izpiek efektu politak sortzen dituzte.
Tontorrera hurbiltzen. Oraindik eguzkia daukagu, baina haize hotza dabil eta aldaketa datorrela sumatzen da.
IZAZPI (973m). Tontor airosoa eta ikuspegi ederrekin.

Hemen Mandubia, Usurbe, Txindoki, Larraone, Balerdi,... ikus daitezke.
Zumarragatik Beasainera doan autobidea behean eta Aizkorri hodeiz apainduta fondoan.

Izarraitzeko tontorrak.

Ez dugu denbora asko egin tontorrean, eta berriz Arantzetagaina lepora jetsiko gara, hortik gaina jarraituz Pagotxetara eta Samiñora jarraitzeko.

Pagotxetako bidegurutzea. Argi dago nora joan behar dugun. Gero berriz hona itzuliko gara, hemendik Elorriagara jeisteko.

Pagolako txabolia, Samiñoren oinean.

Azkenengo aldiz, Aginaga auzotik etorri ginen tontor hauetara. Baina badira urteak...
2001ean

Samiñora igotzen. Aldapa ez oso luzea baina tentea.


SAMIÑO (932m). Apur bat gorago Iruarrietako erpina dago.
Izazpi eta Txindoki eta Aralarreko tontorrak Samiñotik. Hodeiak ugaritu dira. Badator aldaketa...

Aralarreko tontorrekin.

Pagotxeta lepoko txabola. Orain berriz Izazpiren magaletik Elorriaga lepora jetsiko gara.


Eta Elorriagatik zuzenean jetsi beharrean, nahiko gertu dagoen BELOKIra (659m) igo dugu. Hau Antigua gainean geratzen da eta kanpaia ere dauka gurutzean. Zerua oso iluna jartzen ari da...
Belokitik Antiguara zuzenean jetsi gara, basoaren erdian dagoen bidezidor oso malkartsua erabiliz.

Antiguan dagoen jatetxearen barrutik Aizkorri aldea ikusten da, nahiz eta oso hodeitsu egon.
Badaude indarrak berreskuratzeko aukerak...

Antigua. Bost bat orduko ibilaldia egin dugu, lasai eta atseden batzuk hartuz. Gure herritik gertu dauden inguruak dira, baina gutxitan ibilitakoak. Ba zen garaia!

2019/01/20

MURUBE 1129 mt - AITZLUZE 1068 mt - Los Cristinos kobazuloa

2019-01-18 Ostirala, San Anton Txiki eguna. Larraonara etorri gara, aspaldi egin genuen mendi-buelta bat ematera, baina oraindik ezagutzen ez dugun Cristinos haitzuloa bisitatzeko asmoz. Goizeko 10etan abiatu gara, eliza ondotik, giro oso goibelarekin.

Larraona mendateraino pistaz igotzen da. Herria behean. Haranaren beste aldeko mendilerroko gainak bisutsaren ondorioekin.

Iturria bide ertzean.

Larraona mendatera heldu gara. Eskuinean Arteako baso magikoa daukagu, baina hau itzultzerakoan bisitatuko dugu. Gaurko lehenbiziko helburua kobazuloa da.
Larraona mendatean. Ez dabil inor paraje hauetan.


San Benito ermita Larraona mendatean.

Ermitaren inguruak. Hemen eskuinera doan pista hartuko dugu, eta belardi garbiak zeharkatu ondoren Cristinos haitzulora helduko gara.
Hemen dago haitzuloaren sarrera, dolina horretan.

Buruko linternak jarri eta bagoaz barrura. Katea dago behera jeisten laguntzeko, lurra oso labainkorra baita.

Bakar bakarrik gaude eta txundituta egon gara. Ordubete egin dugu barruan eta izugarri dotorea iruditu zaigu. Pena bakarra, argi gutxi genuela argazki hobeak atera ahal izateko. Baina hor doaz batzuk...




Bigarren solairura jeisten. Oso labainkorra da dena eta adi ibili behar da, baina espektakuloa bikaina da.


Laku txiki bat dago beheko solairu honetan.










Ederra benetan.


Bagoaz berriz kanpora. Asko gozatu dugu gauza zoragarri guzti hauek ikusten.
Sentipen berezia da lur azpian ibiltzea, eta nola ez, hortik irtetea ere.

Larraona mendatera itzuliko gara berriz.

Orain horra, Murubera. Hor ere zurituta daude tontorreko zuhaitzak.

Igoera oso lasaia eta ederra da, pago bikainen artean. Hau ezaguna da.

Pagadian gora.


Goiko aldeko zuritasuna.





Hor dago tontorra.

MURUBE (1129m).

Beheruntz. Zuhaitzetatik ur tanta ugari erortzen ari dira eta busti gara apur bat.
Bidean dago Aitzluze tontorra, eta orain gora igoko dugu. Eskillara labaina dago bertara igotzeko.

Buzoia.

Hortik gatoz, Murubetik.

AITZLUZE.


Larraona mendatera jeisten. Pagadia izugarria da.

Larraona mendatera itzuli ondoren, Artea baso magikora sartu gara, inongo biderik jarraitu gabe, intuizioari jarraituz, toki izkutu eta ederrak ezagutuz.

Mastin txakurra?

Azkenean hormen erdiko irteera malkartsu bat aurkitu dugu, eta bertatik jetsi gara herrira doan pistara. Pista jarraitzea besterik ez zaigu geratzen Larraonara itzultzeko. Lau ordu  t´erdi egin dugu guztira eta gustora bukatu dugu ibilaldia. Ez dugu inor ikusi eta benetan ezagutzea merezi duen tokia dela uste dugu.