⛰️🧗Pico VALDOMINGUERO 2265 mt

    

 2024-07-14 Tielve-n egin dugu lo gaur ere. Atzoko palizaren ondoren gaur lasaiago ibili gara. Goizeko 10tan heldu gara JITU DE ESCARANDI-ra (1306m), Sotres-etik Tresviso-ra doan errepidean. Kotxe asko baina aurkitu dugu aparkatzeko tokia, errepide ertzean. Bertatik bezperako Peña Castil eta ingurua ikusten dugu. Jitu-tik Andara-ra doan pista hartu dugu.

 Jazuca saroia, pistaren ezkerrean. Pare bat txabola geratzen dira egoera onean. Hortik ere igo daiteke aterpera, Las Vacas kanaloitik. Guk gaur, pistatik jarraituko dugu.

 Andara-ko aterpearen ondoan dagoen meatzarien bagoneta. Irudi tipikoa.

 Andara aterpea behean utzi eta Mazarrosa aldera doan bidea hartzera goaz. Hemendik tontorreraino ea bakarrik joango gara.

 Ezkerrean ikusten den bidea aterpetik pasa gabe dator hona. Gu, aterpetik pasa gara, ze jende dagoen ikuste arren. Biak dira antzekoak. Jito-tik datorren pista ere ikusten da, eta behelainoak kostaldean.

 Mazarrosa meategietan. Aurrean gaurko helburua, Valdominguero. Hor bi aldiz egonda gaude aurretik, bata gaurko bidetik, elurrarekin, eta bestea eskuineko ertzetik. Baina badira urteak eta gaur errepikatu egingo dugu. Gainontzeko tontorrak ere ezagutzan ditugu.

 Hemen meagintzarako landutako bide erosoa daukagu, eta errez ibiltzen da. Ezkerrean, zuloan, Andara-ko lakua zegoen, baina meagintzarekin pikutara joan zen. Atzean, aterpearen gainean dagoen Mancondiú dotorea. Mancondiú ibilbidea

 Bide erosoa jarraitzen. Lasaitasun handia daukau hemen.

 Lora multzo politak bide bazterrean.

 Baina berehala sartuko gara Pikosetako inguru berezian, jouak, harkaitza nonnahi, igoerak eta jetsierak,... Valdominguero erdian.

 Zeharkaldi luzea ari gara egiten Grajal hormen azpian. Bidea oso nabarmena hemen ere. Atzean, Mancondiú.

 Orain beste jou hau zeharkatu behar dugu, Jou Lleroso, Valdominguero-ren ezkerreko lepora igotzeko.

 Horrelako gauzek bista alaitzen dute.

 Rebeko bikotea Jou Lleroso-ko harritzarrean.

 Valdominguero. Lepora heltzen ari gara. Hau da igo behar dugun Dorrea.

 Valdominguero lepoan. Hona heltzen da Sotres-eko Ibarretik datorren Jidiello kanala. Aurrean, Urrieles mendikatea, Alboak eskuinean, Peña Castil, Urriello, Campanarios, Cuchallón de Villasobrada,...

Lepoan. Atzean Pica del Jierru. Hemendik horra ere igo daiteke. Marka gorri batzuk doaz gainera.

 Lepoan Urrielei begira. Erdian, atzoko Peña Castil, eta eskuinerago Camburero mendatea eta Tortorios.

 Urriello (Naranjoa) eta erdian, Peña Castil, atzo igo genuen aldapa luze eta gogorrarekin. Peña Castil igoera

 Tontorrera igotzen. Hormak zeharkatzen dituen "bira" bat hartzen da, eta eskuak apur bat erabiliz igotzen da.

 Hor atera gara biratik eta orain ertzetik metro batzuk igotzen dira tontorrera heltzeko.

 Ertzean. Gutxi geratzen zaigu.

 VALDOMINGUERO (2265m). Hiru ordu eta erditan kotxetik. Andara mendikateko tontor dotorea. Ez da zaila baina ohituta egon behar da horrelako inguruetan ibiltzen. Guretzat hirugarren aldia da hemen.

 Orain tontor gehienetan dago horrelako harkaitzen bat, mendiaren izenarekin.

 Pikosetako Erdiko Mendikatea (Urrieles) ea osorik. Ezkerreko Peña Vieja-tik eskuineko Albos-etara.

 Peña Castil eta Tortorios aurrean, eta Neverón de Urriello eta Torres Areneras-Albos atzean.

 Ertzetik behera. Lora ugari hemen ere. Oso ederra dago mendia.

 Ertzetik birara jeisten.

 Eta biraren goiko aldean. Bira honek horma guztia zeharkatzen du.

 Dekorazio bikaina birako hormetan.

 Eta beheruntz. Polita da pasabidea.

 Hor behean bukatzen da bira. Ondoren eskuinera hartu behar da, destrepe txikiak eginez.

 Lora gehiago hormetan.

 Bira bukatzen. Gutxi geratzen da hormaren oinera jeisteko.

 Atzera begira, hori da gutxi gorabehera ibilbidea.

 Hemen aurkitu dugu Jierru-tik jetsi den mendizale talde handi bat. Hurrengo egunean jakin genuen, gaur gauean, gu ibili garen mendian, danimarkar bikote bat hormetatik ezin atera geratu dela eta Estatu Batuetara egindako dei satelital baten bitartez, gero Asturias-era pasa eta hemengo erreskate taldeak atera dituela. Hau da mundua...

 Gu berriz bide beretik beheruntz. Mancondiú aurrean, eta behelainoak gora igozten. Baina ez daukagu kezkarik, bidea oso nabarmena baita.

 Bide harritsua baina lora askorekin jouak zeharkatzen.

 Atzera begira. Erdian gure tontorra eta igarotako jouak. Hodeiak gero eta gorago.

 Mazarrosa-n.

 Eta aterpean, behelaino artean. Hemen geratu gara zerbait jatera garagardo freskoen laguntzarekin.

 Eta lasai pistatik behera. Historio asko ditu kontatzeko Andara-k...

 Gustora behelaino artean. Toke berezia ematen dio inguruari. Gainera ez gara busti.

 Irudi politak pista ertzean.

 Zaldiak ere gustora daude Jazuca-ko belardietan. Sei ordu t'erdi tan bukatu dugu ibilbide eder hau.

 Eta eguna ondo bukatzeko, afari goxua Arenas de Cabrales-en sagardoz ondo lagunduta.

Hemen ibilbidea

⛰️PEÑA CASTIL 2441 mt🐐 Zirkularra Moñas eta Carnizoso-tik.

      Berriz PIKOSetara, PARADISUra!!! Aurten bigarren aldiz. Lehen askoz gehiago joaten ginen, baina azkenengo urteetan Pirinioan gabiltza gehiago. Gaur, Uztailak 12, ostirala, goizean atera gara herritik eta lasai goaz, turismo apur bat egiten. Gaua Tielve-n igaroko dugu, eta biharko asmoa lehendik hiru bat aldiz igota daukagun Peña Castil-era joatea da, gero zirkuito gogor bat eginez. Ea ba...

 Oriñón-eko hondartza eta duela gutxi berriz igotako Candina.Candinako igoera

 Islares-en errepide zaharrera atera gara. Hor daukagu Sonabia-Oriñón-eko Balea.

 Llanes baino lehenago bazkaldu dugu eta orain Barro-Niembro aldetik goaz. Hau Niembro-ko eliza eta kanposantua da. Hemendik Arenas de Cabrales eta Tielve-ra helduko gara, Puente Poncebos-eko folloia igaro ondoren.

 2024-07-13 Goizeko 8ak baino lehenago abiatu gara Sotres-etik Pandébano-ra doan pistatik gora, baina erdia baino beherago utzi behar izan dugu kotxea (957m) . Goian dena beteta. Abiapuntutik Sotres herria ikusten dugu. Hodeitsu dago goian. Ea altxatzen duen, behelainoak behean uzten ditugun...

 Pistatik gora, La Robre saroiruntz. Orduerdi daukagu goiko aparkalekuraino. Gaur ez dugu Fresnedal kanaletik igoko. Pandébano-tik Moñas kanala eta Tortorios ibarretik heltzeko asmoa daukagu Camburero lepora. Aurretik beste hiru aldiz igotako daukagu mendi hau, bai Fresnedal-etik eta baita gaurko bidetik.

 Gauean euria egin du eta ihintza galanta dago zelaietan. La Robre aldean gaude.

 Pandébano-ko aparkalekua behan utzi eta Terenosa-ra igotzen ari gara. Lokatza galanta markatuta dagoen bidean.

 Hodeietan sartuko gara berehala.Terenosa-ra bidean, baina ez gara bertara helduko.

 Behi ugari larreetan. Bagaude hodei artean murgilduta.

 Behia. Asturiasko "Casina"

 Txabolak Bulnes herrira jeisten den bidean. Guk Terenosa aterpera heldu baino lehenago, ezkerrera hartuko dugu, intuizioz, eta lehendik ibili garelako hemendik. Hodeiek ez digute uzten ezer ikusten.

 Las Moñas-etik gora goaz. Nahiko zuzen igo dugu eta behelainoak behean utzi ditugunean, lortu dugu bide egokia hartzea. Behean ikusi dugun jende guztia Urriello-runtz joan da. Guk hortik jeistea espero dugu.

 Kanalean gora, bidezidorra hartu ondoren. Aldapa latza, baina nahiko ondo igotzen dena.

 Moñas-etik gora, bidezidorra jarraitzen. Behiak gustora larreetan, eta gu ere, behelainoak gainditu ditugulako.

 Gure atzean Peña Maín-eko tontorrak behelainoen gainetik burua ateratzen.

 Kanalaren goiko zatian oso nabarmena da bidea.

 Bide sigi-sagatsua kanaletik irteteko. Peña Maín atzean.

 Las Moñas saroia (1860m). Txabola guztiak erorita daude. Gari batean artzaiek denboraldi luzeak igarotzen zituzten hemen.

 Txabola gehiago eta Tortorios tontorra eta ibarra aurrean. Ibar hau zeharkatu behar dugu bere luzeran.

 Tortorios ibarrean gora. Atzean, Cabeza de las Moñas tontorra. Behi ugari ibarrean.

   

 Aurrean, Urriello, Neverón de Urriello eta Areneras-Albos mendiak agertu dira.

 Camburero lepora igarotzeko bretxa. Aurrean daukagu Peña Castil. Metro batzuk galdu behar ditugu orain.

 Bretxa zeharkatzen (2080m).

 Camburero lepoa eta Castil-era igotzeko geratzen zaigun 400 metroko aldapa gogorra.

 Urriello gure eskuinean. Gero bere ondotik igaroko dugu.

 Bretxatik Camburero-ra jeisten.

 Camburero-n (2048m). Hona heltzen da Sotres-eko ibarretik gora Fresnedal-etik datorren bidea. Andara mendikateko tontor eta kanalak ikusgai. Bihar, Valdominguero-ra igotzeko asmoa daukagu.

 Urriello eta Neverón de Urriello-ra begira. Ah zer nolako oroitzapenak!...

 Baina aldapa latza daukagu orain. Atzean, Tortorios ibarretik jeisteko bidea ikusten da. Cabezos Llorosos aldea hodeietatik burua ateratzen.

 Dena gora. Ez dago atsedenik. Oraingoz ez dugu jenderik ikusten.

 Poliki baina seguru.

 Ertzera irteteko azkenengo zatian. Camburero eta Cabeza de los Tortorios behean geratzen dira.

 Azkenengo zati hau nahiko labainkorra da, baina ez dauka zailtasunik. Gogortasuna bai.

 Ertzean, tontorretik gertu. Andara mendikatea aurrean, Samelar, Morra de Lechugales, Pico Cortés, Prao Cortés,..., eta Jidiellu, Jierru kanalak besteak beste.

 PEÑA CASTIL (2441m). Laugarren aldiz. Urriello, Neverón eta Torrecerredo ingurua atzean. Harkaitza topera!

 Peña Vieja aldearekin.

 Torre del Carnizoso, Morra, Torre del Oso, Torre Cerredo, Urriello,... Tontorrak eta tontorrak.

 Urriello-ren ekialdeko horma, Cepeda bia e.a.

 Escamellao eta Juan de la Cuadra Mendilerroa, Peña Vieja, eta atzean, Espigüete, Peña Prieta, Curavacas,... Palencia aldea.

 Eta bagoaz beheruntz. Oraindik ibilbide luzea geratzen zaigu, ez baikara toki beretik itzuliko. Orain hasi dira beste mendizale batzuk agertzen goruntz.

 Camburero-ra heltzen. Tontorra goian geratzen da, eta igotzen ari den jendeari begira.

 Camburero-tik Carnizoso-ko amildegietan murgilduko gara, Urriello-ren albora irteteko. Inguru erabat basatia! Jetsiera eta igoera gogorrak geratzen zaizkigu. Aurretik ezaguna dugu tokia eta horregatik sartuko gara hor.

 Urriello. Ekialdeko eta Iparraldeko hormak. Cainejok bai izan zituela arrautzak...

 Torre del Carnizoso. Bere eskuinera aterako gara.

 Hemen bukatzen da zati lasaia. Orain jou gogorrak. Neverón de Urriello eta Albos mendikatea aurrean.

 Amildegietan murgildu baino lehen.

 Aurrean daukagunarekin txundituta. Torre del Carnizoso eta Urriello, eta jetsi eta igo behar ditugun zuloak.

 Castil-en azpiko harritzatik behera, Carnizoso jou-ra bidean.

 Ezkerreko bretxatik gatoz.

 Jou del Carnizoso-ra jetsi behar duguna (1878m), eta ondoren igo behar dugun 200 ta pikuko aldapa latza, Carnizoso lepora.

 Jou-a behean utzi eta bagoaz goruntz. Orain dena igartzen da, aldapa, adina, ibilbidearen luzera,... Baina helduko gara!

 Hainbeste harkaitz artean, lora dotoreak ere agertzen dira.

 Hau da gainean daukaguna. Peña Castil-en hormak. Izugarria!

 Carnizoso lepora irteten (2094m). Kostatu zaigu baina merezi du inguru hauek ezagutzea. Urriello oso gertu orain.

 Eskalatzaileak Urriello-ren ekialdeko horman.

 Eta Celada kanaletik behera. Jetsiera gogorra hau ere.

 Hau da Urriello-ko bide arruntera igotzeko bidea. Jeisteko latza!. Torre del Carnizoso goian.

 Celada kanaletik behera. Han behean elkartuko gara aterpera doan autopistarekin, eta gure oinek eskertuko dute.

 Celada-ren beheko zatia. Aurrean Pico Albo.

 Zati gogorrena bukatzen. Hau da Celada kanala. Atzean, Torre del Carnizoso, eta eskuinean, Urriello-ren ipar hormak.

 Eta aterpetik pasa gabe, beheruntz. Behelainoak hor jarraitzen dute, gero eta gorago. Gustora hartuko ditugu Terenosa aldean. Hau autobidea...

 Urriello. Ipar eta Mendebaldea.

 Tarteka Urriello-raino sartzen dira hodeiak...

 Peña Maín-ek hor jarraitzen du, izkutaketan.

 Vallejo mendatetik Urriello-runtz begira.

 Gozatzen goaz...

 Terenosa aterpean Sergio arabarrarekin. Bertan dago lanean eta garagardo hotza edan eta elkarrizketa bikaina izan dugu berarekin. Baina oraindik kotxera beste ordubete geratzen zaigu... Beraz, agurtu eta behera. Azkenean 10 ordu, 1737 metroko desnibel positiboa eta negatiboa eta 20 kmko distantzia. Ibilbide potentea baina erabat ederra. Hau da Pikos...

Ibilbidea hemen