GABIETOUS 3035-3031 m Ordesatik. 1800 m-ko desnibela.

2009-07-29 Torlan goizeko 1. autobusa hartu ondoren, Ordesa-ko zelaian gaude. Tozal del Mallo eta Carriata-ko zirkoa ditugu gainean. Hori da gure bidea, eta laster utziko ditugu horma guzti horiek gure azpia. Igoera latza gure aurrean...

Nahiz eta itzalean joan oraindik, bero egiten du eta ur hurrupa ugari erango ditugu gaur. Atseden apur bat hartzeko ere ez dator gaizki, malda benetan handia da eta.

Loraz beteta dago Carriata-ko zirkoa. Behean Ordesa, gure abiapuntua, eta hormen azpian Rajón faja-tik Cotatuero-ra doan bidea.

Carriata-ko hormak eta Punta Acuta haranaren beste aldean.

Carriata-ko iltzeak. Hainbat aldiz igaro gara bertatik, ezagunak beraz.

Bertikala.

Baina gustora.

Lehorrak daude eta ez dago arazorik.

Iltzeak gainditu ondoren, Faja de las Flores-en azpira heldu gara. Goian lo egin duten batzuk badoaz bertatik.

Salarons-eko Aguas Tuertas-en.

Salarons-eko zirkoa behean uzten. Eskuinean Mondarruego mendiak eta ezkerrean Salaros-eko Gallinerok babesten dute eremu eder hau. Beheko zelai hori da igoerako toki lasaiena. Gainontzekoa, aldapa tentea.

Aurrean ditugu Gabietou-ren tontorrak. Erditik igotzen da goiko lepo zabaleraino. Baina gu lepora heldu baino lehenago Gabietou-ren ezkerreko ertzera igoko gara, emozio apur bat gehiago emateko igoerari.

Sarrioak lasai dabiltza hemen.

Hemen utziko dugu lepora doan bidea eta ertza hartzera joango gara. Behean, igaro ditugun bi "plateau"ak eta Gallinero ezkerrean.

Ertzean dauden irtenguneak igarotzen. Entretenigarria.

GABIETOU O. (3035m). 1800 metroko garaiera-aldea igo dugu. Ez dago gaizki. Atzean Vignemale.

Bujaruelo mendatea, Bernatuara, Vignemale, Pic de la Sède, Labas, ... , Ardiden eskuinean.

GABIETOU E. (3031m). Atzean, lehenengo tontorra. Berehala igarotzen da batetik bestera.

Gabietou-ren glaziarra Bujaruelo aldera. Horren gainean dagoen lepora jetsiko gara, ondoren eskuinera hartu eta beheko plateau-etara jeisteko.

Lepora jeisten. Hemendik igotzen da normalean.

Lepoa eta Taillón.

Harkaitzen formak.

Salarons-era jeisten ari garela, lora dotoreak agertzen dira.

Basoko linoak Aguas Tuertas-en.

Irudi dotorea osatzen dute.

Edelweisak ere ugariak dira.

Atsedena hartzen Carriata zirkoaren gainean. Igoera gogorra izan da, baina jetsiera ez da makalagoa. Desnibela eta beroa igartzen dira.

Orain iltzetatik jetsi beharrean Fajeta-tik egingo dugu. Hau luzeagoa da, baina apur bat lasaiagoa ere. Polita.

Fajeta-tik behera. Goian Salarons-eko hormak.

Tolesturak.

Espektakularrak Ordesa-ko horma guzti hauek.

Fajeta-ko kablean. Bidea nahiko zabala da, baina amildegia izugarria da.

Carriata zirkotik jeisten. Azkenean beroaldi ederrarekin helduko gara berriz Ordesako Zelaira. Ibilaldi potentea baina izugarri ederra. Ordesan ondo hidratatu gara busa hartu baino lehen.

Torlan geratu gara erosketa batzuk egin eta gorputzari galdutako likidoak eskeintzeko.

Torlako txokoa. Gabietouak Ordesatik bigarren aldia izan da guretzat, baina semeak ez zituen ezagutzen eta hau izan da berriz igotzeko aitzakia. Gustora egindako errepikapena.

PICO RUSSELL 3207 m. Hiru tontor.

2008-08-04 Benasque-n gaude. Ballibierna-rako busari buruzko informazioa behar dugu, bihar goizean bertara igotzeko. Guretzat berriak diren hirumilako batzuk igotzeko asmoa daukagu. Familian gainera.

Gaua Castejón de Sos-eko Pájaro Loco ostatuan igaroko dugu.

2008-08-05 Goizeko 6retan Coronas zubian gaude gosaltzen, Ballibierna haranean. Lehenengo busa hartu dugu Benasquen. Busa beteta etorri da, baina ea denak Anetora dihoaz. Gu hirurok eta beste bikote batek bakarrik hartuko dugu Llosás aldera.

Argitu du eta Llosás-era goazela hor ditugu Ballibierna-ko bi gailurrak erdian.

Ballibierna-ko paisaia.

Bidegurutzea. Gaur ezkerrera hartuko dugu, Llosás aldera.

Pleta de Llosás-en. Goian, Aneto-Tempestades-Margalida (hauek ezagutzen ditugu), eta eskuinean gaurko helburua, Russell.

Ballibierna gailurrak eskuinean geratzen dira. Hor ere egonda gaude.

Pleta de Llosás behean utzi dugu eta lakura igotzen ari gara.

Heldu gara Llosás-eko lakura. Goian, Llosás-eko orratzak.

Argarot-Tchihatchef-Franqueville. Llosás-eko orratzak.

Llosás-eko laku ederra.

Errododendroak bidean.

Russell-en hormen azpira igotzen ari gara, bide zehatzik jarraitu gabe, intuizioz eta noizbehinka agertzen diren mugarriak jarraituz. Ballibierna tontorrak gero eta dotoreagoak gure eskuinean.

Elurgune batzuk igaro behar izan ditugu, baina nahiko ondo heldu gara Russell nagusira igotzeko hartu behar den "birara". Beste bikotea ere hona dator. Gero tontorrean elkartuko gara, eta kasualitatez, Debako bikote ezagun bat da. Ballibierna atzean.

Llosás-eko orratzen altueran gaude. Beraien atzean Posets agertzen da.

Russell-erako digonalean sartzera goaz. Atzean Tempestades gailurra eguzkitan.

Trepada erraz batzuk egin behar dira bira-diagonalean. "Anbiente" dotorea.

Diagonaletik irteten.

Behin goiko aldean, hor ditugu Aneto, Tempestades, Margalida eta guk jeisterakoan igoko dugun Punta Brecha Russell. Goi Pirinioa!

Igo dugun diagonala erdiko zuloan, itzalean. Atzean, Aneto-Tempestades eta atzerago Perdiguero mendikatea.

RUSSELL tontor nagusian (3207m). Atzean, Hegoekialdeko tontorra. Laster joango gara bertara, ertz dotore hori igarota.

Maldito tontorrera doan Cregüeña-ko ertza lehenbiziko planoan, eta Seil dera Bacquo-Portillón-Perdiguero-Lliterola-Crabioules atzean.

Hirurok tontorrean. Atzean, Aneto-Tempestades-Margalida.

Helikopteroa agertu da bapatean igo dugun tokitik. Praktikak egiten daudela uste dugu.

Aita-semeok Hegoekialdeko tontorrean (3205m), tontor nagusitik ikusita. Sei tontor edo omen ditu Russell-ek (hirumilakoen zerrendan). Gu erdiarekin konformatuko gara. Ez daukagu bildumazaletasunik...

Bigarren puntan gaude lehenengotik ikusita, eta hau da joan-etorrian ibiliko dugun ertza. Aereoa zenbait tokitan.

Lora polit eta koloretsuak ere badaude hainbeste harkaitzen artean.

Joan-etorria egin ondoren, hirugarren tontorrera igo dugu, Punta Brecha Russell-era (3192m). Atzean, Margalida eta Salenques ertza.

Margalida hemendik oso espektakularra ikusten da. Salenques ertza eta glaziarra.

Salenques, Barrancs, Mulleres, Forcanada,...

Putreen balleta ikusteko aukera ere daukagu.

Mendizaleak Tempestades gailurrean, eta Aneto atzean, bere ohiko jendetzarekin.

Margalida-ren tontor estua. Duela urte batzuk egon ginen hor.

Gustora ibili gara goian, baina jeisteko ordua da. Diagonalera sartzen.

Toki batzutan oso tentea da, baina ez da zaila.

Akrobaziaren bat egiten.

Diagonalaren beheko aldean.

Igoerako inguru berberetik jetsi dugu Margalida eta Tempestades-en azpian dagoen harritza eta belar eta errododendroak dauden inguru lasaiagora heldu gara.

Llosás-eko laku txikia inguratzen. Hemen bidezidorra daukagu. Eskertzen da, hainbeste harkaitz artean ibili ondoren.

Llosás-eko laku ederrean. Goian orratzak.

Ballibiernako errekaren ondoan, urjauzi politak ikusten.

Garaiz heldu gara Benasque-ra itzultzeko autobusa hartzera, baina hori bai, kola egin eta azkenean ea borrokan ibili gara tokia hartzeko. Pozik gaude. Irteera oso interesgarria, tontor berriak guretzat eta familian. Gozamena!

1, 2 eta 3 dira igo ditugun tontorrak. Egindako ibilbidea urdiñez.